138. Berðu ábyrgð á lífinu þínu

 

Þú færð ekki það sem þú vilt, þú færð það sem þú sættir þig við. Það er mjög mikilvægt að átta sig á sannleikanum í þessu. Ef þú spáir virkilega í þetta þá er allt sem þú hefur í lífinu þínu í dag sem þér líkar ekki við tilkomið af því að þú hefur lært að sætta þig við eitthvað sem þú vilt ekki. Alveg sama hvað það er. 

Eitt af því sem er okkur mjög tamt og við höfum vanið okkur á er að kenna öðrum og öðru um allt í lífinu. Við tökum ekki ábyrgð og skellum skuldinni á aðra. 

En ef kringumstæður okkar eru öðrum að kenna þá hljóta þessir aðrir að þurfa að breytast til að kringumstæður þínar geti breyst. Og þetta er vondur staður að vera á. Þetta tekur allt vald af þér og þú ferð að upplifa þig veika og máttlausa, svona eins og viljalaust verkfæri í eigin lífi.